बोगस डॉक्‍टरने वापरली खासदारांची शिफारसपत्रे

मुंबई - कर्करोग, एड्‌स अशा दुर्धर आजारांवर उपचार केल्याचा दावा करणाऱ्या स्वयंघोषित शास्त्रज्ज्ञ मुनीर खानने पदमश्री पुरस्कार मिळविण्यासाठी खासदारांचे बोगस शिफारसपत्र राष्ट्रपतींकडे पाठविण्यासाठी तयार केले होते, अशी माहिती पोलिसांनी प्रतिज्ञापत्राद्वारे उच्च न्यायालयात उघड केली आहे.

खानने अटकपूर्व जामिनासाठी केलेल्या मुंबई उच्च न्यायालयातील याचिकेत पोलिसांनी प्रतिज्ञापत्र दाखल केले आहे. या प्रतिज्ञापत्रात सरकारी वकील अजय गडकरी यांनी न्या. आर. एस. मोहिते यांच्या न्यायालयात प्रतिज्ञापत्र दाखल केले आहे. खानने दावा केलेल्या औषधांबाबत त्याच्या बॉडी रिव्हायवल या कार्यालयात पोलिसांनी छापा टाकला होती. त्यावेळी सापडलेल्या कागदपत्रांमध्ये पोलिसांना तीन खासदारांनी शिफारस केलेली पत्रे आढळली आहेत, असे गडकरी यांनी "सकाळ'ला सांगितले. या शिफारस पत्रापैकी उत्तर प्रदेशमधील खासदार रशीद आल्वी यांचे शिफारस पत्र बोगस असल्याचे पोलिसांनी प्रतिज्ञापत्रामध्ये स्पष्ट केले आहे. अन्य दोन खासदारांमध्ये रामदास आठवले व बर्क शफिक रहीमतुल्ला यांची शिफारसपत्रे असून पोलिस याबाबत तपास करीत असल्याचे न्यायालयाला सांगण्यात आले आहे. न्या. मोहिते यांनी खानचा जामीनअर्ज नामंजूर केला आहे. मुनीर खानच्या विरोधात मालाड, सांताक्रूझ, खार अशा विविध पोलिस ठाण्यांमध्ये पन्नासहून अधिक तक्रारी दाखल झाल्या आहेत. खानला जामीन मिळू नये, यासाठी ज्येष्ठ अभिनेत्री तबस्सुम यांनी न्यायालयात अर्ज केला होता. आपली दिशाभूल करून दूरचित्रवाहिन्यांवर मुलाखतींद्वारे बोगस औषधे विकण्याचा प्रयत्न केला, असे तबस्सुम यांचे म्हणणे आहे. राजकीय नेत्यांची बोगस शिफारसपत्रे वापरून राष्ट्रपतींकडे पाठविणाऱ्या खानवर कारवाई व्हायला हवी, असे तबस्सुम यांचे वकील महेश वासवानी यांनी सांगितले. खानचा जामीन न्यायालयाने नाकारला असला तरी येत्या 26 एप्रिलपर्यंत त्याला अटक करू नये, असे निर्देश न्यायालयाने पोलिसांना दिले आहेत.

वार्तास्त्रोत